مشهد نهار داخلي (مش نهار أوي يعني، وقت المسلسل بتاع الساعة 6). الجدة العجوز منكمشة على الكنبة كالعادة، بينما (سهر) جالسة على السفرة تتظاهر بالمذاكرة وهي منهمكة في الغناء
إنتي اللي عملتي لكل شباب الدنيا قللللللللللللللق وعملتي قلوبهم سلسلة وخلخال ورررررررررقتصرخ الجدة العجوز منزعجة: خلخال لما يبقى يخلخل ضروسك يا مقصوفة الرقبة إنتي.... تعالي يابت افتحيلنا المدعوق ده، خلينا نرتاح من زنك شوية
تضرب سهر الأرض برجلها مغمغمة.... حاضر يا تييييييتة... أجيبلك الأخبار ولا المسلسل؟
صوت الجدة خافتا هذه المرة في استسلام... هاتي المسلسل بتاع (مندور بيه أبو الدهب)
سعاد: على القناة التانية يا سهر (يعلو صوت الأم آتية من المطبخ)
سهر: مش عليها المسلسل يا ماما
سعاد: أمال فيه إيه!!!!!!
سهر: جايبين كنيسة زي اللي كانوا جايبينها في عيد البت ماري صاحبتي
سعاد: وريني كده يا مقروضة (تنظر الأم إلى الشاشة بتمعن)
الجدة: إيه ده يا سعاد؟
سعاد: ده قداس يا خالتي....أصل النهارده عيد الغِطاس، كل سنة وإنتي طيبة
طيب هاتي القناة الأولى يا سهر.... نشوف الأخبار، خلينا نعرف المخفي وصل لحد فين (طبعا كلنا عارفين مين المخفي ).. لأ لأ لأ إوعوا تفهموني غلط.. كده تودوني في داهية (أنا قصدي المخفي اللي كان عامل جولة في المنطقة)
يعلو صوت المذيع... أما عن أنباء الطقس فيسود البلاد في الأيام القادمة طقس شديد البرودة صباحاً ومساءاً، مع إحتمال سقوط أمطار غزيرة ليلاً ونهاراً بينما تكثر الشبورة صباحاً في كل المحافظات ومساءاً في كل المدن... وتقل الرؤية حتى 99.9%
وتتراوح درجة الحرارة الأسبوع المقبل ما بين الصغرى (صفر-1) أما العظمى(2-1.5)
عندما ينهي المذيع جملته ترقع سعاد بالصوت يا مراري يااااااااااااني.... البرد هيقرقش عضمنا السنة دي
عندها تقول الجدة بسخرية مرة ماهو إن غِطس النصراني... طِلع البرد الجواني
فروزن